الأحد، 20 أكتوبر، 2013

محصول الـ 3 شهور ^_^

يسعد لي أيامكم جميعاً

يارب عساكم بخير ^^

صج إن كل الوقت بإنستقرام وأغلب إبداعاتي وكل جديدي هناك
بس ما تهون علي المدونة ... قلبي الصغير لا يتحمل
لازم حتى لو قطعت فترة أرجع وأنزل لكم رسماتي

ما تهون علي الصراحة إن أسكرها
وهي بدايتي وهني تشجيعي وكل نقد أنطرح شجعني بصقل موهبتي

ولأجل ذلك سأحاول مقاومة كل موقع يفتح ويحاول خطفي من هنا
*_^ هههههه .. الحين أخليكم مع مجموعتي المتواضعة من رسوماتي:






ها ... شرايكم في تطور ولا مثل ما كنت !!!؟
 والقليل من الخربشات الباقية
تلقونها بحسابي الإنستقرامي @Awooosha

وألقاكم على خير إن شاء الله
=)


الجمعة، 19 يوليو، 2013

مـــبــــارك عــلـــيـــكـــم الــشــهــر الــفــضــيــل


السلام عليكم ورحمة الله وبركاته 
يا أهلا ومرحبا فيكم ^^
وحشتووووني هالـــــكـــثــــر =)

مبارك عليكم الشهر الفضيل 

للأسف للأسف صرت ما أقعد وايد على اللابتوب
كل وقتي على الآيباد ومن الكسل ما أفتح اللابتوب علشان أنزل كل جديدي ><

بس أكيد مو ناسيتكم ^^
وهني جمعت لكم كل رسوماتي لشهر يونيو 
من اللي نزلتهم على الإنستقرام 
كان فيه تحدي حلو .. وهو إن لكل يوم في موضوع نرسم عنه
وبصراحة واااايد أستمتعت بالتحدي والأفكار اللي رسمتها ^^



وعلشان تشوفون الرسوم أوضح وأكبر ممكن 
تتابعون حسابي على الإنستقرام : Awooosha@

وربي يسهل عليكم صيام الشهر وقيامه
ويتقبل جميع أعمالكم 

وألقاكم على خير إن شاء الله
=)

الثلاثاء، 21 مايو، 2013

الرسم على الورق والتلوين ببرنامج Art Studio


السلام عليكم جميعاً .. يسعد أيامكم يا رب
كيف الحال والصحة وباقي الأمور
يا رب تكون بخير ^^

إنستغرام وما أدراك ما إنستغرام << سارقني منكم خطفني
لكني هربت منه علشان أشارككم رسوماتي =)

أولاً نبتدي بالرسم المباشر على برنامج Art Studio على الآيباد

(1)

(2)


والحين نبتدي هالإبداع اليديد اللي عجبني
وهو إني أرسم على الورق وأصور الرسمة
وبعدين أدخلها على البرنامج وألونها دايركت ^^

(3)



 (4)



 (5)



(6)


وأخيراً وليس آخراً
بعض من تقنياتي اللي أستخدمها في الرسم على هالبرنامج الخطير:


أتمنى لكم المتعة والفائدة
وشاكرة لكم مروركم وإطلالتك لمدونتي المتواضعة
والسموحة على أي تقصير 3>


ألقاكم على خير إن شاء الله
=)

السبت، 6 أبريل، 2013

عودة بعد فترة خمول =)

السلام عليكم ورحمة الله وبركاته

يسعد أيامكم جميعاً يا رب ^^

Am back .. Am back

رجعت أقرأ آخر تدوينة لي 
وقلت شلون فكرت إني ما راح أرسم مرة ثانية

بس صج يعني 3 شهور أفكار مشتت وضعط عمل ومسؤوليات بالبيت
غصب ما راح أقدر أرسم ><

والحمدلله .. عدت السالفة على خير
يوم كنت أتصفح رسومات لفنانين أتابعهم في إنستقرام 
وفجأة ولعت اللمبة اللي فوق راسي D=

وياني إلهام وأنا أتابع أحد الفنانات 
وقلت خلني أجرب طريقتها 

ونجحت ^ ^ 
كانت طريقتها إنها ترسم على الورق وبعدين تلونه 
وأنا طريقتي كانت يا أما أرسم وألون دايركت على الورق
أو على برنامج الرسم ~_~

طلع تغيير طريقة الرسم جداً أفادني =)

ما نطول في الكلام عليكم >> بعد ما خلصت قلت ما بطول ههههه
يلا تفضلوا الرسومات 

هذي الرسمة واللي بعدها رسمتهم بشهر يناير بس مادري شلون نسيت أنزلهم >< 


وهني كانت بداية العودة للرسم بالشهر اللي فات ^^
لاحظوا الورق اللي راسمة عليه يبين صح .. أحلى =)



وبعدين رجعت للرسم الدايركت على البرنامج >> لازم نرجع للعادة *_^

 وبعدين حنيت للرسم بالألوان المائية

هذي سلمكم الله رسمة قديمة من 3 سنوات تقريباً
وراح تلقونها هني بالمدونة .. من زمان كان خاطري ألونها ~ وأخيراً لونتها

السمك أكثر كائن أرسمه ^^ أدري
وخلصنا ^^ فترة وعدت 
أشكر لكم دعمكم ووقفتكم معاي وكل كلمة قلتوها لي كان لها أثر علي

ما أنحرم منكم ومن متابعتكم ومن زيارتكم وتعليقاتكم الجميلة
وألقاكم على خير إن شاء الله 
=)

السبت، 23 فبراير، 2013

فقدت موهبتي !!!


السلام عليكم ورحمة الله وبركاته

يسعد أيامكم جميعاً  .. أخباركم عساكم بخير إن شاء الله

إيه عنوان التدوينة صح ~

ما أعرف من وين أبدأ بس من كم شهر وأنا أعاني من هالشي
الإلهام للرسم غايب ، أحاول أمسك القلم وأرسم يدي ترجف وكأني مبتدئة بالرسم
البن تول صديقي بالفوتوشوب هم تخلى عني نقاطه ما عادت تعني لي شي
برنامجي المحبب والقريب لقلبي على الآيباد Art studio فرشاته تعطيني ألوان مالها معنى

بالمختصر إهتمامي بالرسم غاب أختفى
ما كأني بيوم كنت أرسم !! أنا بنفسي مستغربة من حالتي
وبعد فترة خلاص أقتنعت باللي أنا فيه

إني أتخلى عن الرسم نهائياً

لكن هذي مو نهاية الحياة ^^

بدل الرسم صار كل إهتمامي بالأشغال اليدوية
إدمان على الكروشية والأعمال من الصلصال والخياطة
كل تفكيري بإبتكار أشياء جديدة منهم

خاصة الكروشية والخياطة
صاروا هم من هواياتي المحببة لقلبي
غارقة في عالم الأقمشة والألوان والخامات الجميلة

يعني مجال المدونة راح ينحرف من عالم الرسم
لعالم الكروشية والخياطة والأشغال اليدوية
وراح أنزل تدوينات عن أعمالي وبعض الدروس اللي طبقتها بأعمالي

متشوقة لخوض هالتجربة اليديدة
مع بعض الألم لفقدي إهتمامي بالرسم خاصة لما أشوف رسومات الرسامين =(

ربي يسهل الأمور إن شاء الله
ويكون بعوني وعون الجميع يا رب

ألقاكم على خير قريباً بإذن الله
=)